מִזְמ֥וֹר לְתוֹדָ֑ה    הָרִ֥יעוּ לַֽ֝יהוָ֗ה כָּל־הָאָֽרֶץ׃ ב עִבְד֣וּ אֶת־יְהוָ֣ה בְּשִׂמְחָ֑ה    בֹּ֥אוּ לְ֝פָנָ֗יו בִּרְנָנָֽה׃ ג דְּע֗וּ    כִּֽי־יְהוָה֮ ה֤וּא אֱלֹ֫הִ֥ים הֽוּא־עָ֭שָׂנוּ ולא (וְל֣וֹ) אֲנַ֑חְנוּ    עַ֝מּ֗וֹ וְצֹ֣אן מַרְעִיתֽוֹ׃ ד בֹּ֤אוּ שְׁעָרָ֨יו ׀ בְּתוֹדָ֗ה חֲצֵֽרֹתָ֥יו בִּתְהִלָּ֑ה    הֽוֹדוּ־ל֝֗וֹ בָּֽרְכ֥וּ שְׁמֽוֹ׃ ה כִּי־ט֣וֹב יְ֭הוָה לְעוֹלָ֣ם חַסְדּ֑וֹ    וְעַד־דֹּ֥ר וָ֝דֹ֗ר אֱמֽוּנָתֽוֹ׃